Иҷлосияи ҳафтуми Маҷлиси вакилони халқи ноҳияи Спитамен, даъвати ҳафтум баргузор гардид Дар толори калони Мақомоти иҷроияи ҳокимияти давлатии ноҳияи Спитамен таҳти раёсати раиси ноҳия Ҷамшед Ҷӯразода Иҷлосияи ҳафтуми Маҷлиси вакилони халқи ноҳияи Спитамен, даъвати ҳафтум баргузор гардид. Дар кори иҷлосия намояндаи Мақомоти иҷроияи ҳокимияти давлатии вилояти Суғд Илҳом Худойдодзода, муовинони раиси ноҳия, роҳбарони сохторҳои мақомоти иҷроияи ҳокимияти давлатии ноҳия, роҳбарони мақомоти ҳифзи ҳуқуқ, раисони ҷамоатҳои шаҳраку деҳот, намояндагони ташкилоту муассисаҳо ва дигар шахсони масъул иштирок намуданд. Иттилоъ дода шуд, ки аз 34 нафар вакилони Маҷлиси вакилони халқи ноҳия 30 нафар иштирок намуда, 4 нафар бо сабабҳои узрнок ҳузур надоштанд. Иҷлосияро муовини якуми Раиси ноҳияи Спитамен, вакил аз ҳавзаи интихоботии «Нурафшон» №6 Муҳаммадназар Ҷовид ифтитоҳ намуда, рӯзномаи ҷаласаро ба баррасӣ пешниҳод кард. Аз рӯйи рӯзномаи иҷлосия як қатор масъалаҳои муҳим мавриди баррасӣ қарор гирифтанд. Аз ҷумла, масъалаи аз эътибор соқит намудани ваколати вакили Маҷлиси вакилони халқи ноҳияи Спитамен аз ҳавзаи интихоботии «Спитамен» №1 баррасӣ гардид. Ҳамчунин вакилон пешниҳоди марбут ба Фармони Президенти Ҷумҳурии Тоҷикистон аз 22 майи соли 2026, №1179 «Дар бораи Раиси ноҳияи Спитамени вилояти Суғд таъин намудани Ҷӯразода Ҷамшед Ҳабибулло»-ро муҳокима намуда, онро ҷонибдорӣ карданд. Дар иҷлосия масъалаи оид ба рафти иҷрои Қонуни Ҷумҳурии Тоҷикистон «Дар бораи танзими ҷашну маросим дар Ҷумҳурии Тоҷикистон» низ мавриди баррасӣ қарор гирифта, вобаста ба иҷрои талаботи қонун дар ноҳия ҳисоботи муовини раиси ноҳия Дилрабо Раҳимӣ шунида шуд. Инчунин ҳисоботи комиссияи доимии Маҷлиси вакилони халқи ноҳия оид ба масъалаҳои тандурустӣ, таъминоти иҷтимоӣ ва ҳифзи саломатии аҳолӣ аз ҷониби Исобоев Дилшод пешниҳод гардид. Вакил Каримова Гулчеҳра аз ҳавзаи интихоботии «Куруш» №29 оид ба фаъолияти вакилии худ ҳисобот дода, аз корҳои анҷомшуда ва мулоқоту баррасии масъалаҳои шаҳрвандон дар ҳавзаи интихоботӣ маълумот пешниҳод намуд. Дар идомаи иҷлосия масъалаи ворид намудани тағйиру иловаҳо ба қисми даромад ва хароҷоти буҷети маҳаллии ноҳияи Спитамен барои нимсолаи якуми соли 2026 муҳокима гардида, қарорҳои дахлдор қабул шуданд. Ҳамзамон қарорҳои Раиси ноҳия оид ба масъалаҳои кадрӣ, инчунин як қатор қарорҳо ва амрҳои Раиси ноҳия мавриди тасдиқи вакилон қарор гирифтанд. Баъди муҳокимаи ҳамаҷонибаи масъалаҳои рӯзнома аз рӯйи ҳар як масъала қарорҳои дахлдор қабул гардида, барои иҷро ба сохторҳои масъул супоришҳои мушаххас дода шуданд. Дар охири кори иҷлосия намояндаи Мақомоти иҷроияи ҳокимияти давлатии вилояти Суғд суханронӣ намуда, ҷиҳати татбиқи ҳадафҳои рушди иҷтимоию иқтисодии ноҳия ва иҷрои вазифаҳои дар назди мақомоти маҳаллӣ гузошташуда тавсияҳо пешниҳод кард. Иҷлосия дар фазои созандаву корӣ ҷараён гирифта, дар оғоз ва анҷоми он Суруди миллии Ҷумҳурии Тоҷикистон садо дод.

Ба истиқболи 35-солагии Истиқлоли давлатӣ дар ноҳияи Спитамен мумфаршкунии кӯчаҳо вусъат меёбад Дар доираи корҳои ободониву созандагӣ бахшида ба ҷашни 35-солагии Истиқлоли давлатии Ҷумҳурии Тоҷикистон дар ноҳияи Спитамен бо иштироки Раиси ноҳия Ҷамшед Ҷӯразода ба мумфаршкунии як қатор кӯчаҳои маҳаллӣ оғоз бахшида шуд. Дар ин доира кӯчаи Фирдавсӣ ба масофаи 650 метр, кӯчаи ба номи Кенҷабоева ба дарозии 500 метр ва кӯчаи ба номи П. Турсунов ба масофаи 250 метр мумфарш карда шуданд. Иқдоми мазкур бо саҳмгузории соҳибкорони ватандӯст ва дастгирии сокинони маҳаллаҳо амалӣ гардида, ба беҳтар намудани ҳолати роҳҳои дохилии маҳаллаҳо ва фароҳам овардани шароити мусоид барои рафтуомади шаҳрвандон мусоидат менамояд. Зимни иштирок дар ҷараёни корҳои мумфаршкунӣ Раиси ноҳия таъкид намуд, ки ободонии маҳал ва беҳсозии инфрасохтори роҳҳо аз самтҳои муҳими сиёсати созандагии давлат ба ҳисоб рафта, дар остонаи ҷашни бузурги миллӣ чунин ташаббусҳо бояд боз ҳам густариш ёбанд. Сокинони маҳаллаҳо аз анҷоми ин корҳои ободонӣ изҳори қаноатмандӣ намуда, саҳми соҳибкорон ва дастгирии мақомоти маҳаллиро дар рушди маҳалҳои аҳолинишин назаррас арзёбӣ карданд. Корҳои созандагиву ободонӣ бахшида ба 35-солагии Истиқлоли давлатии Ҷумҳурии Тоҷикистон дар ноҳияи Спитамен идома дошта, дар оянда татбиқи як қатор лоиҳаҳои дигари инфрасохторӣ низ ба нақша гирифта шудааст.

Поси хотири фарзандони миллат – омили бедории худогоҳии миллӣ Дар толори мақомоти иҷроияи ҳокимияти давлатии ноҳияи Спитамен мулоқоти гурӯҳи тарғиботии вилояти Суғд бо иштироки фаъолон, намояндагони қишрҳои гуногуни ҷомеа ва масъулини соҳаҳои муҳими ноҳия баргузор гардид. Чорабиниро раиси ноҳияи Спитамен Ҷамшед Ҷӯразода ифтитоҳ намуда, таъкид кард, ки мулоқоти мазкур дар партави дастуру ҳидоятҳои хирадмандонаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки дар Паёми навбатии худ ба Маҷлиси Олии Ҷумҳурии Тоҷикистон ироа намудаанд, инчунин дар заминаи барқияи мақомоти иҷроияи ҳокимияти давлатии вилояти Суғд аз 2 июни соли 2026 доир гардида истодааст. Зикр гардид, ки эълон шудани соли 2026 ҳамчун «Соли вусъат додани корҳои ободониву созандагӣ ва тақвияту таҳкими худшиносию худогоҳии миллӣ» барои ҳар як сокини кишвар масъулияти бештар ҷиҳати саҳмгузорӣ дар пешрафту ободии Ватан ва таҳкими арзишҳои миллӣ ба миён меорад. Раиси ноҳия ҳайати гурӯҳи тарғиботии вилоятиро ба иштирокдорон муаррифӣ намуда, аз ҷумла Рустамзода Сӯҳроб – сармутахассиси шуъбаи рушди иҷтимоӣ ва робита бо ҷомеаи дастгоҳи Раиси вилояти Суғд, Абдуллозода Шуҳрат ва Баҳодур Ҳабибулло – устодони Донишкадаи иқтисод ва савдои Донишгоҳи давлатии тиҷорати Тоҷикистон дар шаҳри Хуҷанд ва Мӯсозода Ҳоҷӣ Ҳусайн – сархатиби масҷиди марказии ҷомеи «Шайх Маслиҳаддин»-и шаҳри Хуҷандро хайрамақдам гуфт. Дар мулоқот вакилони Маҷлиси вакилони халқи ноҳия, роҳбарони ташкилоту муассисаҳо, намояндагони шуъбаю бахшҳои рушди иҷтимоӣ ва робита бо ҷомеа, фарҳанг, кор бо занон ва оила, кор бо ҷавонон ва варзиш, Кумитаи иҷроияи Ҳизби Халқии Демократии Тоҷикистон, роҳбарони муассисаҳои таълимӣ, имомхатибон, раисони ҷамоатҳои шаҳраку деҳот ва раисони кумитаҳои маҳаллаҳо иштирок намуданд. Зимни суханронии худ Ҷамшед Ҷӯразода иброз дошт, ки мулоқоти имрӯза ба яке аз масъалаҳои муҳими идеологӣ ва таърихӣ – иқдоми бесобиқа ва ватандӯстонаи Пешвои миллат оид ба интиқол додани хоки фарзандони фарзонаи миллат аз оромгоҳи Донскойи шаҳри Москва ба пойтахти мамлакат – шаҳри Душанбе бахшида шудааст. Таъкид гардид, ки ин иқдоми таърихӣ дар бедор намудани эҳсоси гарми ватандӯстӣ, таҳкими худшиносиву худогоҳии миллӣ ва арҷгузорӣ ба хизматҳои фарзандони барӯманди миллат нақши муассир дорад. Ин амали хирадмандонаи Роҳбари давлат ҳамчун рамзи эҳтиром ба таърихи миллат ва қадршиносӣ аз шахсиятҳое арзёбӣ мегардад, ки барои ҳифзи арзишҳои миллӣ ва рушди давлатдории тоҷикон хизматҳои арзишманд анҷом додаанд. Иштирокдорони мулоқот таъкид намуданд, ки чунин ташаббусҳои ватандӯстона барои таҳкими ваҳдати миллӣ, баланд бардоштани ҳисси масъулияти шаҳрвандӣ ва тарбияи насли ҷавон дар рӯҳияи ифтихори миллӣ аҳамияти муҳим доранд. Дар идомаи мулоқот аъзои гурӯҳи тарғиботии вилояти Суғд оид ба масъалаҳои худшиносии миллӣ, эҳтиром ба таъриху фарҳанги миллат, ҳифзи арзишҳои давлатӣ ва нақши онҳо дар рушди ҷомеаи муосир суханронӣ намуда, андешаҳои худро ба ҳозирин пешниҳод карданд.